COPA-TOGO : Contacts

Ɖetí, ɖayá.

Abóoboó.

Ɖoo bɩɩjɔ́ɔ nɛ́, fɔɔ́-daá kpɩná wooduuziná ɖamá, akpára kokule ɖɩdáarɛ, bɩka báa ngbeére ánboɖé ánlʊ́m. Ánboɖé nɛ́, Abóoboó tánlɩɩ kʊlʊ́; baaganáa rɩ́ŋa wánlɩɩ́, kɩḿ kʊjɔɔ́ɔ gɛ, na a bɛ́ńdɛ́ḿ kokule, ɩmʊ́ ɩlɩ́ɩ ɩlá ɩdɩ buuruú na ɩfʊ́lʊ na ɩkɔ́gbɔɔ kegbém. Waajʊ́ʊ ɖaána nɛ́, na wéndéédi yéńdi ɩsɩ:
Mána túu ɖáálʊ́
ŋmɩntɩ́m ŋmɩ́nnáa ŋmɩ́mm ŋmɩntɩ́mɩ́m
Naárʊ takʊ́ ɩká.

ŋmɩntɩ́m ŋmɩ́nnáa ŋmɩ́mm ŋmɩntɩ́m ŋmɩ́nná
na waadála nɛ́, ɩfɩ́nɩ ɩtɔ́ ɩɖɛɛlɩnáa bɛlɛ́ bótúú lelemá, bɩka wánwɩlɩ́ɩ wɛ léné bɩɩnɩ́ɩ yɩ nɛ́, bɩka bɛlɛ́ bánŋmɩtɩ́, bɛlɛ́ bánŋmɩtɩ́.
Kiivé ɖʊɖɔ wɔɔgɔ́nɩ nɛ́ bɩlɛ́, ngɛ wɩ́rɛ nɛ́, aláa ce ńba sɩsɩ: báa ngbeére ɖɔ́ɔ́ ɖájaa na túu bánlʊ́m kʊ, naárʊ tángaḿ, bɩka ɩmʊ́ gɛ bɩ́nnɩɩ́. Ngɛ bɛlɛ́ badaá kʊ́bɔnɩ́ wɔɔgɔ́nɩ sɩ ɩcɔ́ŋɩ yɩ, ɩsɩ: asée ɖɔ́ɔ́gɔ́nɩ ɖɩcɔ́ŋ ɖájaa ceení. Ɩlɛ́ waadála nɛ́, ngɛ ɩlɛ́ waamʊ́sɩ kokule ɖɩdáarɛ, ngɛ ɩlɛ́ waana baaganáa rɩ́ŋa waalɩ́ɩ balʊ́ Abóoboó talɩ́ɩ kʊlʊ́.
Kokule wɛ́ńdɛ́ḿ nɛ́, ngɛ Abóoboó waalɩ́ɩ kubó kibiláázɩ kɩdɩ, bɩnáa alʊ́ ɩlɛ́ waana nɛ́, ɩlɛ́ waabaná nɩ́bááwʊ nakɩ́rɩ, ɩlɛ́ ibó ɩtála ɖaána. Ɩlɛ́ waadála nɛ́, ngɛ Abóoboó waadála. Kɩɩjʊ́ʊ́na ɖaána nɛ́, ngɛ kɩɩbáázɩ yéńdi téédi. Waadála nɛ́, alʊ́ lí ńnɩ́ ɩlɛ́ weevééri ɩyɔ́ɖɔ́ɔ́nɩnáa wenbí bɩɩgála nɛ́, ngɛ bɛlɛ́ booduú lelemá abá awɛ ánlarɩ́ɩ.
Waadála ifu waazá lululuu sɩsɩ: bɛlɛ́ báŋmɩtɩ ɩmʊ́ lelemá bɩɩnɩ́ɩ ɩmʊ́ nɛ́, ngɛ bɛlɛ́ boozolí lelemá abá ánlarɩ́ɩ waca-waca bɩlɛ́ nɛ́, bɔɔgbɔ́ɔ babɩrɩná yɩ, ngɛ Abóoboó waajáŋ kise kɩkpɔ́ɔ sewɔ́ɔ pata-pata. Kɩtála nɩgbaawʊ́ kutoluú lénlé bɩjɔɔ́ɔ kaanɩŋá nɛ́.
Bɩɩva ná Abóoboó sɔɔlɛ́ɛ lɩ́m bɩlɛ́, lelemá amʊ́ baabɩrɩná yɩ nɛ́ weeyéle Abóoboó ɩcáŋ kití buwá-daá hálɩ na sinje búúzi-daá gɛ kɩwɛ bɩlɛ́.

Bob DE CRAENE (TAÏROU)

Fenɔɔ́, Wɩ́sɩ, na Ɩrʊ́.

Ɖoo bɩɩjɔ́ɔ nɛ́, wɩ́sɩ, fenɔɔ́ na ɩrʊ́ bɛgɛ́ɛ ɖɔnɖɩ́rɛ gɛ. Wɩ́rɛ neɖére nɛ́, Ɩsɔ́ɔ Ẃuro Kʊ́bɔńɩ waayáa wɛ, ngɛ weevééri wɛ sɩsɩ: mɔ́wɛná ɖɔndʊ́ʊ naárʊ, ɩdɛ́ɛ ɖaána cɔɔ́ɔ bolíni na cé. Mɔ́wɛná yɩ kɩmɛ́rɛ fáya ńɖɛ. Mɔ́zɔɔlɛ́ɛ ibó ɩkɔ́bɔɔzɩ yɩ liideé amʊ́; bɩlɛ́ nɛ́, ɩgbɩ́ɩ́rɩ mɩ́dɩ nɩ́bááwʊ kɩ́bɩɩzʊ́ʊ boɖé. Ngɛ Ɩsɔ́ɔ waava barɩ́ŋa ɖiboole ɩsɩ bɔ́tɔɔ nɩ́bááwʊ-daá nɛ́. Ngɛ wɩ́rɛ neɖére, wɩ́sɩ, fenɔɔ́, na ɩrʊ́ baagʊrʊ́. Bɛdɛ́ɛ nɩ́bááwʊ wénleerí bɩ́ɩ́zɩ loɖo.

Bɩ́nɩ kaɖaa ńnɩ́, ɩrʊ́ wɔɔdɔ́ɔ ɩdɛ́ɛ ɖiboole cɩ́kɔ. Bɩ́nɩ sɩɩlɛ ńnɩ́ nɛ́, ngɛ waabá ɩtɔ́ɔ ɖabata. Fenɔɔ́ kɛlɛ́ ɖʊɖɔ kɔɔdɔ́ɔ kɛdɛ́ɛ ńɖɛ. Bɩ́nɩ toozo ńnɩ́, ɩrʊ́ wɔɔdɔ́ɔ ɩdɛ́ɛ ɖiboole hálɩ fɔɔlʊʊ́ ɩtɛ́. Fenɔɔ́ kɛlɛ́ kabamáa kɔ́ndɔwʊ́ʊ kɛdɛ́ɛ ńɖɛ cɩ́kɔ-cɩ́kɔ bɩka wɩ́sɩ sɩlɛ́ sidetekiná ta sɩdɛ́ɛ ɖiboole wenɖé Ɩsɔ́ɔ Wúro Kʊ́bɔnɩ́ waagává sɩ nɛ́.
Baadála kɩmɛ́rɛ-dʊ́ʊ weení Ɩsɔ́ɔ Wúro Kʊ́bɔnɩ́ weegédiri wɛ ɩjɔ́ nɛ́, ngɛ beevééri ɩlɛ́ wenbí bʊrɔɔzɩ́ bajaa weegédiri wɛ sɩ nɛ́. Ngɛ ɩlɛ́ weejéle wɛ wenbí bajaa weegédiri wɛ sɩ bɔkpɔ́ɔ nɛ́. Ngɛ beegégbéná liideé weená bɛɛgɛ́vɛrɛ wɛ nɛ́.
Kabɩsɩ́-daá, ɩrʊ́ na fenɔɔ́ bɔdɔ́ɔ bɛdɛ́ɛ ɖiboole nyazɩ bɛ́nɖɛɛ́ na bɔtɔ́ɔ nɛ́. Bɩ́ɩ́zɩ nasídoozo waalá ɖʊɖɔ nɛ́, ɩrʊ́ igúti ɩvɛ́yɩ́na nabʊ́rʊ ɩjɔ́. Fenɔɔ́ kɛlɛ́ kadángɩlɩ́ ɖíi nɛ́, kɔwɛná ɖibooleyɔ́ɔ cɩkɔ́; wɩ́sɩ sɩlɛ́ sɩjɔɔ́ɔ ɖóni boloozóóni badaá nɛ́, sɩdabaazɩ tá sɩdɛ́ɛ ɖiboole tɔwʊ́ʊ.
Alʊwáátɩ wenkí baadála Ɩsɔ́ɔ ɩzá-daá nɛ́, ngɛ Ɩsɔ́ɔ wɛɛzɛ́ɛ wɛ. Ngɛ sɩsɩ báa weení ɩ́wɩlɩ ɩmʊ́ ɩdɛ́ɛ ɖiboole. Baabáázɩ ɩrʊ́ wɩɩzɩ́ nbɩlɛ́, fenɔɔ́ kɛlɛ́ kacáŋ kakpɔ́ɔ maazɩrɛ, bɩka bɩjɔɔ́ɔ wɩ́sɩ niíni. Ngɛ wɩ́sɩ waawɩ́lɩ sɩdɛ́ɛ ɖiboole; fenɔɔ́ na ɩrʊ́ bɛlɛ́ bɛdɛ́ɛ ɖiboole wɛɛgɛ́dɛ nɛ́, badawɩ́lɩ.
Bɩdɩ́ŋa-rɔ gɛ Ɩsɔ́ɔ sɩsɩ: ɩrʊ́ wánzɩ́m ɩdándakabɩsɩ ɖʊɖɔ; fenɔɔ́ ɖʊɖɔ wánzɩ́m, amá kángabɩsɩ́; bɩka wɩ́sɩ tánzɩḿ kɛtɛngɛrɛ.

Bob DE CRAENE (TAÏROU)